Yangiliklar (for all)

Qoraqalpog‘istonda MDHdagi eng yirik shamol elektr stansiyasi qurilishi boshlandi

Qoraqalpog‘istonda quvvati 1,5 GVt bo‘lgan Kungrad shamol elektr stansiyasi qurilishi boshlandi. ACWA ma’lumotlariga ko‘ra, u MDHdagi eng yirik shamol energetikasi loyihasiga aylanadi.

Qurilishga start 18 sentabr kuni prezident Shavkat Mirziyoyevning Qoraqalpog‘istonga safari chog‘ida berildi. Loyihani saudiyalik ACWA amalga oshirmoqda.

Kungrad shamol elektr stansiyasi quvvati 300 MVt bo‘lgan energiya to‘plash tizimini o‘z ichiga oladi. Stansiyani yagona energiya tizimiga ulash uchun taxminan 1,5 ming kilometr yuqori kuchlanishli liniyalar va 500 kV kuchlanishdagi uchta ulash stansiyasini qurish, shuningdek yana ikkita podstansiyani modernizatsiya qilish rejalashtirilgan.

Qurilishning eng yuqori bosqichida loyiha taxminan 4 mingta ish o‘rni yaratadi. Lokalizatsiya hajmi qariyb $750 mln deb baholanmoqda.

Kompaniya kelajakdagi energetika obyektlari uchun mutaxassislar tayyorlash bilan ham shug‘ullanmoqda. Hozir Qoraqalpog‘istondan 78 nafar talaba Shirin College’da tahsil olmoqda.

ACWAning $4 mlrdlik loyihalari

Kungrad shamol elektr stansiyasi Qoraqalpog‘istondagi ACWAning yanada yirik energetika portfelining bir qismiga aylanadi.

Hozir mintaqada allaqachon Beruniy va Qorao‘zak tumanlarida “Nukus-1” va “Nukus-2” loyihalari faoliyat yuritmoqda. Ularning jami quvvati 300 MVtni, energiya to‘plash tizimlarining quvvati esa 100 MVtni tashkil etadi.

Loyihalashtirilayotgan va qurilayotgan obyektlar bilan birga Qoraqalpog‘istondagi ACWA loyihalarining umumiy quvvati qariyb 2,3 GVtga yetadi. Investitsiyalar hajmi taxminan $4 mlrd, energiya to‘plash tizimlarining jami quvvati esa 650 MVt deb baholanmoqda.

Kutilishicha, mintaqadagi kompaniyaning barcha loyihalari yiliga qariyb 8,77 mlrd kVt·soat elektr energiyasi ishlab chiqarishi mumkin bo‘ladi. ACWA bahosiga ko‘ra, bu taxminan 2,4 mln xonadon ehtiyojini ta’minlash uchun yetarli.

Shuningdek, loyihalar yiliga qariyb 2,1 mlrd kub metr tabiiy gazni tejash va karbonat angidrid chiqindilarini deyarli 5 mln tonnaga kamaytirish imkonini beradi.

2030 yilga borib Qoraqalpog‘istondagi shamol elektr stansiyalarining jami quvvatini 3,3 GVtga, yashil energetika ulushini esa 76%ga yetkazish rejalashtirilgan.