Yangiliklar
O‘zbekiston Prezidenti Turkiya kompaniyalari rahbarlari bilan uchrashuv o‘tkazdi
O‘zaro manfaatli hamkorlikni yanada kengaytirish, jumladan, mamlakatimiz iqtisodiyoti tarmoqlarini rivojlantirish va modernizatsiya qilish bo‘yicha qo‘shma loyihalarni amalga oshirish masalalari ko‘rib chiqildi.
O‘zbekiston Prezidentining yaqinda Anqaraga tashrifi doirasida bo‘lib o‘tgan O‘zbekiston-Turkiya ishbilarmonlar kengashi yig‘ilishi yakunlari mamnuniyat bilan qayd etildi. Erishilgan kelishuvlarni amalga oshirishni jadallashtirish zarurligi ta’kidlandi.
Kompaniyalar istiqbolli loyihalarni amalga oshirish rejalarini taqdim etdi.
Yo‘l infratuzilmasini modernizatsiya qilish va qurish, yashil energiya quvvatlarini yaratish, birgalikda geologik tadqiqotlar va istiqbolli konlarni o‘zlashtirish shular jumlasidandir.
Qayd etish joizki, Cengiz Holding ishtirokida O‘zbekistonda ikkita loyiha muvaffaqiyatli yakunlandi – Toshkent va Sirdaryo viloyatlarida umumiy quvvati 460 megavatt bo‘lgan zamonaviy elektr stansiyalari ishga tushirildi. Jizzax viloyatida quvvati 500 megavattdan ortiq bo‘lgan yana bir elektr stansiyasi qurilishi davom etmoqda.
